تفاصيل

by توماس بشاي

اشعار بالعامية المصرية
الديوان الاول للشاعر توماس بشاي

لو كان اللقا علي قد الشوق
انا كنت بنيت جواكي بيوت
لو كان الشوق اخرتة حضنك
انا كنت سكنته لحد ما اموت
و لو كان حضنك
لكنه ماكنش
يا حبيبه بعيد انا متغرب
يا حبيبه بعيد
امتي نقرب
ده علي قد ما حضنك
كان راحه
علي قد ما بعده عني عذاب
الحضن حبيبتي في اول ضمه
هيبان علي طول لو كان كداب

Paperback

First published January 1, 2015

Reviews

[DỘn Mando · Rating 3 out of 5]

قبل ما اتكلم عن الديوان .. انا متابع لشعر او خواطر توماس بشاي من 4 او 5 سنين
من قبل ما يتشهر او يكون له ديوان معروف مع دار نشر محترمة زي الرواق
توماس اختار اسم هايل للديوان بتاعه .. اسم لايق على الديوان .. تفاصيل
الديوان فعلا تفاصيل بسيطة في نفسية البنت , في الحب , العشق , في تفاصيل البنت
في نفسية الرجل , في الحياة , الامل .
- مجموعة تفاصيل بسيطة كتبها توماس بلغة سهلة و بسيطة بدون تعقيد
- الديوان قرأته في نص ساعة تقريبا .. و الشئ اللي يحسب له بجد
انك متزهقش طول ما انت بتقرا فيه مع انه كديوان شعر مش قوي
ممكن يتوصف اكتر بكونه خواطر ملضومة بالشعر , او محاولات شعرية ناجحة جدا
لكن القصايد قصيرة جدا مبتلحقش تندمج معاها .. لكن توماس عوضها بدقة الكلمة
و خياله في وصف و تجميل التفاصيل .
- يؤخذ على الديوان دة ان القصايد قصيرة , في بعض القصايد حسيت انه في اقحام لبعض الكلمات
لمجرد المشي على الوزن و القافية و دي غلطة في معظم شعراء الجيل دة .
- بالنسبالي الديوان دة انجح من الحزن البعيد الهادي لمحمد ابراهيم
هيتقالي ازاي يا عم و محمد بيكتب احسن و شعره اقوى ..
هقولك على عيني و راسي لكن محمد ابراهيم معملش اي تنوع في الديوان .. كله حزن و كاَبة
توماس في تفاصيل اتكلم عن حاجات كتير اوي برغم قلة صفحات الديوان و قصايده القصيرة
- محاولة ناجحة يا توماس لكن انا واثق انه عندك الاقوى من كدة :)

[Mãñøshã Eßrãhëm · Rating 1 out of 5]

مجموعة خواطر وليست ديوان ..
لم ترق لي ..

[Mohamed zidan · Rating 3 out of 5]

ديوان لامس ناس كتير و بيعبر عنهم

[Shapinam Khaled · Rating 3 out of 5]

مجموعة قصائد جميلة جداً و لكن لا اعتقد انه من ذوقي. أرشحه اياً كان.3>

[Toqa Ibrahim · Rating 3 out of 5]

توماس أنت فعلا مميز ...
ويمكن انا اصلا معظم الديوان من قبل ما اجيبه
ده كفاية لوحدها " عشوائية لم شعرك
خاتنى أحب اللغبطة "

بس أعتقد تعليقى الوحيد
أن نفسى القصيدة تتطول ... تكون أكبر
تعرف تتطول على نفس الطريقة ده
هيكون بجد أمتع من القصايد المميزة بجد
" هم ساخر . الهروب .عارفة .تايه "

[Gina Adel · Rating 5 out of 5]

توماس رأيى فى شعرك متغيرش من اول حاجة قريتهالك لحد دلوقت هو أنه بسيط بيوصف مشاعر عميقة ويعرضها بشكل سهل.. الديوان حالة على بعضه ياتحبة وتعيشة ياتمل منه وانا فى ديوانك عشت الحالة مش بس حبيتها ... مبدع يا صديقى ربنا يوفقك.

[Amira Rashad · Rating 5 out of 5]

الديواان تحفة ، تشبيهات مختلفة ، بحسه بيشوف الدنيا من ناحية تانية غير اللي احنا شايفنها ، شايفها من فوق ناصية سحاب ^^ فيه امل و فرحة و تخليد لكل حاجة حلوة في حياتنا ♥

[محمد الحويف · Rating 2 out of 5]

الديوان دا ينطبق عليه حرفياً " كُل حاجة حلوة . . بس لوحدها " . . حقيقي يعني :D

مبدئياً أنا مُتابع توماس من حوالي 4 سنين مثلاً ، توماس مُختلف ، عبقري تشبيهات . . علشان كدا كل تشبيهاته تقريباً عبقرية ، بس تحويل التشبيهات دي لسياق شعري دا اللي ماكنش علي المستوي المطلوب .

كمتابع قديم لتوماس فالديوان ماكانش علي مستوي التوقعات ، كديوان أول لتوماس يُعتبر جيد .

المُشكلة ، إن توماس مش بيهري ، مش زي المُعظم دلوقتي . . المُعظم حالياً بيهري بلا فكرة ولا هدف ولا اسلوب ولا صياغة .
توماس عنده الفكرة والاسلوب والهدف بس ناقصة الصياغة الكلية .

[Moustafa Mounir · Rating 4 out of 5]

كأول ديوان ليك .. أحب أقولك عاش جدا ... بس إحنا ممكن نعمل تعديل بسيط في الطبعة الجاية و نكتب شعر و خواطر بالعامية ... لأن كان في خواطر في النص ... قصيدة "الهروب" أقولك عليها شابو من هنا لبكرة ... الفواصل كمان اللي بين كل مجموعة قصايد روعة و خصوصا:" كل البنات ماشية ... بس إنتِ عكس السير ... كل البنات تعشق ... بس إنتِ عشقك غير" ... شعرك يلمس من كتر بساطته و واضح إنك بتسمع منير كتير ... ال٤ نجوم مستحقة كأول ديوان و مستنيين جديدك بإذن الله :-)

[Wafaa · Rating 4 out of 5]

بالنسبالي شِعر العامية أساسه البساطة و دي أكتر حاجة عجبتني في تفاصيل،
توماس اهتم بتفاصيل بسيطة جداً بس ليها معنى كبير جداً، من أول الغلاف -اللي هو لوحده حكاية و ليه نجمة في التقييم- و الإهداء لحد آخر كلمة فيه.
في المجمل ديوان خفيف و بسيط خرجني من مود المذاكرة :D
أكتر قصايد عجبتني.. تفاصيلك، لو كان، سوستة الفستان <3

[MoNa RoHoMa · Rating 5 out of 5]

توماس بجد انت ازاى كده
الديوان تحفه و كلماته ملهاش حل بسيطه و جميله و قريبه من القلب
من اول مره قريت كلماتك على الصفحه و انا منتظراها بفارغ الصبر
و بمجرد ما نزل المعرض كلمت المكتبه اللى فى بلدى عشان تجيبه و فضلت اكترمن اسبوع رايحه جايه عليهم عشان اعرف حايجى امتى
و بجد معرفتش اسيبه من ايدى حتى بعد ما قرايته
خلتنى اعيش حاله غير عاديه من الفرحه و الحب من اول صفحه فيه لاخرها
keep up ^_^ ^_^

[Ghada Mohsen · Rating 5 out of 5]

عن فرحتى وانا بقرأ الديوان..لانى كننت منتظرة صدورة جدااا
توماس (هو شاعر الرومانسيه الاول لهذا العصر )
قد ايه اشعاره لو اتغنت وانتشرت الدنيا هتحلو
بيعبر عن الرومانسيه الشيك و قداسة الحب
منبهره جدا وبصقف طول ما انا بقرا الديوان
وطبعا اتحفظ من حلاوته ..ونايمه وانا بقول كلماته وفرحانه

[Asmaa Alshaer · Rating 4 out of 5]

ديوان جميل جدا بجد ^_^ بس فيه عيب لفت انتباهي من اول ماتصفحته
ياريت تراعيه في الديوان الجاي بقي وهو ان الديوان صغير عاوزينه يجي عشروومييييييشت صفحه كده عشان مش يخلص بسرعه :D
دمتم سالمين :D وبنجاحكم متهنيين :D

[Pinky Reads · Rating 5 out of 5]

الراقي جدًا توماس بشاي
اللي حبيت الشعر العامي بسببه
من المبدعين القلائل اللي حبيتهم جدًا الفترة الأخيرة واتمني انك تكون سعيد وتستمر اكتر في نجاحك دا
الكلام اللي مكتوب حقيقي بحسه طالع من القلب للقلب كدا من غير رتوش من غير مجاملة من غير تصنع
أحسنت .. وأتمني اقرالك ديمًا وتبدع ديمًا ^^

[Rana Atef · Rating 4 out of 5]

بحب جدا شعر وخواطر توماس والديوان دا متلخبط حبتين بس كالعاده معنديش تعقيب على كلماته غير انها جميله جدا .. دايما لقدام يا توماس ^_^

[Tasneem · Rating 3 out of 5]

:)

ﻻزم يكون في أقوي من كدا ،،

بداية طيبة لكن كنت متوقعة أقوي من كدا بكتير !


بالتوفيق

[Hager Moharram · Rating 3 out of 5]

Good start .. liked alot of parts... But a note during publishing take care of spelling mistakes .. for instance على instead of علي

[Esraa Hamdi · Rating 5 out of 5]

nice work !

أشعار تحفة وتشبيهات خرافية تلمسك من جواك .. حاجات كتير أثرت فيا بشكل إيجابي و فيه كمية طاقة إيجابية ومشاعر حلوة أوي :')

[Basma · Rating 5 out of 5]

الديوان حلو جدا بدأت اقراه اول ما جبته و معرفتش اسيبه من غير ما اخلصه.. اسلوبه حلو و بسيط و قريب من القلب من احلى الشعر اللى قريته بدايه حلوه اوى لتوماس بشاى و فى انتظار الاحلى

[Amira Hammood · Rating 5 out of 5]

الديواااان تحفة 3>

[Nourhan Zidan]

انا بحب شعر توماس بشاي جداً افكار جديدة كلام قريب للقلب
اتبسطت جداً ان نزل ديووان بس القصايد قصيرة الوزن ف اماكن كان بيكون مش مظبوط خالص ده ميمنعش ان فى قصايد اكيد حلوة اوى

[Reem · Rating 4 out of 5]

" لو كان اللقا علي قد الشوق
انا كنت بنيت جواكي بيوت
لو كان الشوق اخرته حضنك
انا كنت سكنته لحد ما اموت .. "

[Yassmen Elmalah · Rating 4 out of 5]

جميل جدا

[Aghared · Rating 2 out of 5]

اراها كخواطر شعرية رائعه لكن لا ترتقي لتوصف بقصائد شعريه
توماس حد موهوب الكتاب كان ممكن يبقى احسن من كده كتير
جود لاك المرة الجايه

[أحمد كمال · Rating 3 out of 5]

الديوان قصايده عادية
مفيهاش اى حاجة تشد .. عجبتنى قصيدة واحدة و الأبيات الصغيرة اللى بين كل قصيدتين - و مش كلها -
كأول ديوان .. مش وحش ..
بس لازم يكوون فيه أحسن ^_^

[Mohammed · Rating 2 out of 5]

معاني جميلة في كثير من الاحيان ولكن صياغتها ركيكة وغير موسيقية

[Hamza El-Kady · Rating 2 out of 5]

غلب عليها طابع الخواطر اكتر منها قصائد
مستوي الكاتب متوسط تقريبا
محتاج كتير من التعديل و كتير من الشغل علي نفسه
الافكار كتير منها مكرر للأسف او حول نفس المحور