بث تجريبي

by عمرو أبوزيد

ديوان بالعامية المصرية - معرض القاهرة للكتاب -2015

Genres: Poetry

180 pages, Paperback

First published January 1, 2015

Reviews

[Ahmad Zakaria · Rating 4 out of 5]

عمرو ابو زيد عمل ديوانه الاول ( نوفمبر شهر مناسب للموت).. و كان بالنسبالي ديوان مش رائع... و كل قصايدة رائعة..
المشكلة عندي كانت اني ببقي متوقع كتاب. .. مش مجرد حاجة بتجمع قصايد الكاتب( اللي مفيش اتنين بيختلفوا عليها)..
( نوفمبر شهر مناسب للموت).. كانت اوحش حاجه فيه في رأيي انه مكنش في غير قصيدة واحدة اللي بتمثل الحالة بتاعة الاسم و هي قصيدة ( نوفمبر شهر مناسب للموت)...اما بقي ( بث تجريبي)....
عمرو كتب مقدمة فشيخة كانها عارفة ايه اللي معجبنيش في الديوان الاول... بالظبط احلامي عن ديوان لعمرو. .
بيتهيألي عمرو اتمني يخلي الديوان شبه فيلم السيما... هو فيلم واحد. .. بتناقضاته او بدونها... انا حسيت انه عايز يعمل كده... رغم ان مش طول الديوان نجح في ده معايا... بس يمكن يكون السر اني عارف كل القصايد اصلا... فتأثير الالفة بوظ شوية (تريكات المخرج) اللي عند عمرو..

في المجمل الديوان حلو فشخ.. كنت متوقع انه هيبقي احسن بس ده لمجرد اني متعود ان عمرو ابو زيد ( الفتى الرهيب)..
باقي ملحوظة واحده... هي انك لو عايز تقرا شعر مزيكته مظبوطه لازم تقرا لابو زيد اللي لما بحس بكسرة في الكلام و انا بقراله... براجع القرايه و انا متوقع اني انا اللي غلطان... و بلاقي ده.

[منةُ الله · Rating 4 out of 5]

بأحب أقرا لعمرو بصفة عامة، متابعاه من زمان وبأستمتع بقصايده؛ من الناس ال لها بصمة وكلامه بيتميز، وبناء على ذلك الديوان كان ممتع بالنسبة لي :D
المميز لأي لديوان إنك كمتابع تلاقي حاجة جديدة للشاعر مش مجرد تجميع للقصايد وده توفر في بث تجريبي.
من أكتر الحاجات ال بتميز عمرو أبو زيد إنه بيكتب نفسه أكتر ما بيكتب للناس وإنه يعمل كدة ويوصل للناس ده شيء عظيم جدا.
المقدمة واﻹهداء بيبقوا من أول الحاجات ال بتلفت نظري في أي كتاب، وعمرو متفرد جدا في النقطتين دول.
أكتر قصيدة علقت معايا "مرسال للغريب" أكيدفي قصايد أقوى وأجمل منها بس الصداقة من الحاجات ال بأحب أقرا عنها ونادر ما ما بألاقي قصيدة بتتكلم عنها بالدفا ده.

[Ňađa Khaled · Rating 5 out of 5]

بث تجريبى

ينصح بيه لاى حد مصدق فى سحر السيما وانها الوحيدة اللى قادرة انها تحررك وتفك قيودك
للى بيحبوا ربنا بس غالبا بيحسوا انه زعلان منهم طول الوقت ..
للناس اللى بيحبوا العزلة بس بيخافوا من الوحدة
للناس اللى المزيكا بتفتح قلبهم وروحهم بطفاشة
اللى وشهم بيتحول لعجينة مجهولة الملامح من الفرح والشجن سوا لما العيد ييجى..
للخوافين بس مش جبنا
للغير محظوظين فى العلاقات الانسانية بشكل عام وفى الحب بشكل خاص!

وخلينا نقول انى اكتشف ان شعر ابوزيد ماينفعش يتقرى بالعين
لازم كل كلمة تنطقها وتمثلها وتتفاعل معاها عشان تحس بوقعها
احلى ما فى الديوان انه مش مطلع اللى بيجرب دة (القوي الذكي الخالي من الضعف اللى اتوجد عشان يقتدي بيه الشباب - على طريقة أدهم صبري)
اللى بيجرب دة بيبقى شبهك جدا بيغلط ويندم ..يحتار ويختار فيتكعبل ويقع ..بيعافر ويزهق
لان غالبا بيبقى كل الكلام الحكيم والتحفة -اللى بنحبه- بيبقى اساطير لما بيتحط على ارض الواقع..والديوان دة واقع اللى بالرغم من جمال كلامه مش هتحس ان حكاياته خيال وان دة اللى بيحصل فعلا وان الدنيا مش بتقف على لحظات التجارب دى
الديوان دة قريته براحة جدا.. غالبا كنت خايفة ليخلص :D
هو تصبيرة وبيضيف تفصيلة فى يومك مختلفة..
انا مُمتنة للمشاهد والاغانى والصور اللى مليانين نفحة خفة وسلام خلونى اقول الله
من اول المقدمة اللى حمستنى وفيلم طائر ع الطريق اللى بقى عندى شغف انى اشوفه للزمالك اللى هدعيله يكسب! :D
انا منحازة ليه ولبساطة اسلوبه مش عشان انه اتكلم عن مرضى الارق واغنية تحت الياسمينا والعبقرى محسن محى الدين اطلاقاً :D ,
لانى فعلا مؤمنة انه هيبقى مستقبلا شاعر وسيناريست عظيم
يمكن مش هعرف احدد ايه اكتر قصيدة عجبتنى لان كلهم رائعين بس اكتر قصايد قفشت نفسى بعيدهم كتير جدا هم
حكايات ..السر ..المنتمى والخوف فى لوحات
انا كان عندى صندوق ملياه ورق.. فيه اكتر جمل قريتها وعجبتنى ..لما الدنيا بتضلم بختار ورقة عشوائى واعتبرها نصيبى من العلامات
الصندوق دة اتضافله ورق كتير من بث تجريبى..
اعمالا ب اخر جملة فى الديوان اللى كانت
"تجرب تحكى ف بتفشل.. وتكتب توصف الحالة"
فانا غالبا كل ما هفشل انى احكى هفتح الديوان دة او هاخد ورقة من الصندوق عشان يوصف الحالة.

[amira Mahmoud Yusuf · Rating 4 out of 5]

حبيته فعلا..بحمل شئ خاص للكتاب اللي يعيشني معاه تجربة الشاعر بصدق فعلا..خلصت الديوان وأنا عارفه مفردات من عالمه.."الأب الغائب الحاضر..الاحباطات اللي بتشبه لخساير الزمالك المتكررة ومع ذلك بيفضل يحبه كل مرة بنفس الحماس..السهر بليل..عينين البنت اللي بتحكي حكايات..احباطات الدراسة..والاختيارات الغلط..الصحاب.."..وكل ده متضفر بطريقة هتخليك تلاقي نفسك بشكل او بآخر وسط التجربة دي..، الديوان من اوله لآخره بتتابع وتناقضات "حياة" حقيقية، وحتى اختلاف مستوى قصايد الديوان رسخ الانطباع ده، والمزيكا بتاعة الديوان حلوة..وانا اتبسطت وانا بقرأه فعلا..
"ولكن عشان يستطيع يبقى نفسه
خسر نُص عمره
وأكتر شوية"

[Mennat-allah Yousif · Rating 5 out of 5]

طب ابتدي منين ! :-D
حبيت اشوف اقتباس م الكتاب لقيت اني تقريبا كل الصفحات اقتباس
الديوان دا معمول بمزاج .. لامس النفس جدا
الكلمة طالعة علشان هدف .. الكلمة محطوطة بحساب
مظبوط و موزون عَ الشعرة :)
شدني .

العيب الوحيد ..
و هو مش عيب و اتكلم عنه ف المقدمة*
انه مش متقسم ..
حسيت انه بيدور ف دايرة واحدة

[محمد الحويف · Rating 3 out of 5]

" إنتميت للبرد فترة
وإنتميت للسيما فترة
وإحتميت بعيونها ياما
والعشم في العين . .
مُخاطرة "

الديوان في المُجمل جيد ، ولكن لم يصل لما توقعته في الديوان الثاني لعمرو أبو زيد

[Yasmen Elshafey · Rating 5 out of 5]

في رأيي محدش بيكتب شعر عامي أحسن من عمرو أبو زيد ، الكلام حلو بزيادة وخلصته بسرعة ومحستش بالوقت وأنا بقرأه .. كنت عايزة أكتب اكتر كلام عجبني فيه بس مع معرفتش ﻷن كل الديوان تحفة .. شكراً يا منة :D

[محمود عبدالناصر · Rating 4 out of 5]

واحد من الدواوين الى وانت بتقراها بتاخد قرار انك لازم تقراه مره واتنين وعشره كمان ..مينفعلوش مره واحده ابدا

[Hamza El-Kady · Rating 3 out of 5]

ديوان متوسط فيه شويه قصائد حلوه زي دوثه افضلهم تقريبا
مشكلته بس ان هو فيه خلل كبير فوزن كتير من القصائد
لكن في قصائد عجبني فيها انها معموله علي هيئه لحن اغاني
فالمجمل الديوان متوسط

[Mahmoud Elmoustapha · Rating 5 out of 5]

مش عارف أبدأ منين ، بس أنا باحب عمرو أبو زيد شخصياً ، يمكن لأن باشوف أنه فيه حاجات كتير مني، أو يمكن لأني باحسه لسان حالي ، أو يمكن لما باقرا له أي حاجة باحسه انه اخويا الكبير رغم أن ماعنديش اخوات ولاد! مش عارف بس هو حب ربّاني مالوش سبب.
و الديوان دة عمّق حبي لأبو زيد أكتر وأكتر.. أغلب قصائد الديوان مش مجرد كلام وخلاص ، إنما قصص ومواقف هتشوف نفسك فيها بالتأكيد لو كنت بتحب السينما و شايفها أعظم حاجة في الوجود ، لو المزيكا بالنسبة لك اكتر شيء بيعطي لك طاقة ، لو بتحب تميل أحياناً للعزلة لكنك بتترعب من الوحدة ، لو كنت غير محظوظ في الحب أو بتحب و مش طايل اللي بتحبه أو غير محظوظ عموماً في العلاقات البشرية، لو كنت بتتحمل نتيجة اختياراتك الخاطئة..
أسلوب عمرو بيعتمد على البساطة والرمزية ، سهل الممتنع ، والممتع في نفس الوقت ، الإيقاع الموسيقى السلس في قصائده ، كل كلمة محطوطة في مكانها صح وموزونة بدقة شديدة ، بيصيغ مفرداته بحرفية مهندس يعكف على رسم مشروع ضخم .. عمل مزيج خطير في ترتيب القصائد بين التوهة والخوف والحب والجرح والصداقة والأفلام والنفس ، لدرجة اني اتفاجئت أن الديوان خلص وأنا ماسكه ، و مش قادر احدد اي قصيدة علقت معايا اكتر لأن كل القصائد بالنسبة لي كملت بعضها اللهم إلا واحدة أو اتنين.
المقدمة اللي كتبها لقيتها في النهاية هي رؤيتي للديوان وتحليلي له ، وعشان كدة هاقتبس جزء منها :
( الديوان ده لا يُنصح بيه أبدا لعشاق الأشياء الكاملة .. لو انت من الناس اللي عندها قواعدها الصارمة لكل شئ في الحياة ممكن تواجه مشاكل وانت بتقرأ الديوان ده..لو عندك اسراف في استخدام وصف "تافه" لكل حاجة لا تتوافق بشكل تام مع قائمة اهتماماتك .. ممكن تواجه مشاكل وانت بتقرأ الديوان ده.. لو دايما بتسأل نفسك «وبعدين ؟» في نهاية كل رواية الكاتب بتاعها قرر إنه يسيب هامش حرية لخيال القارئ .. ممكن تواجه مشاكل وانت بتقرأ الديوان ده .. لو بتحب بيليه أكتر ما بتحب مارادونا .. غالبا هتواجه مشاكل وانت بتقرأ الديوان ده.
أكتر ناس هتستمتع بالقصايد اللي هنا .. هم اللي ليهم زواياهم الخاصة في النظر للأشياء ...بيحبوا يسمعوا الأغاني وهي بتتغنى لايف في الحفلات أكتر ما بيحبوا يسمعوها متسجلة في ستديوهات .. وبتعجبهم الأفلام اللي نهاياتها تحتمل أكتر من معنى مش اللي أبطالها بيتجوزوا بعض في الأخر .. بيحسوا بغربة وعدم راحة تجاه صورهم اللي اتعملها «إيدِت» .. وبيعتبروا الجاذبية أهم كتير من جمال الملامح في نظرتهم للجنس الآخر.
الديوان ده هو تقديس لفكرة التجربة .. الشعر تجربة .. الحب تجربة .. الثورة والفن والنجاح والفشل .. الحياة كلها تجربة .. كل الأفكار اللي انت هتقراها هنا قابلة للتغيير .. كل القواعد ممكن تتبدل .. كل القناعات فيها شك كبير .. الديوان ده مجرد تسجيل لتجارب مش تسجيل لنتايج .. هذا العمل بقصايده بتشبيهاته بقوافيه لا يتعدى كونه .. بث تجريبي )

عمرو أبو زيد هيكون من أفضل الشعراء في مصر لو استمر على نهجه و أشتغل على نفسه كل مدى..

[Salemeltahan · Rating 3 out of 5]

اقل مما توقعت بكتير يعني عدد قليل جدا من القصائد اللي حسيت اني بقرأ شعر عامي .. كنت مأمل إني أقـرا حـاجه أحـسن .. ممكن نجمه واحـده بس كفايـه ع الديـوان .. والنجمـتين عـشان انـا بحـب عـمرو جدا .. واتمنى انه ميستعجلش على اصدار ديوانه عـشان ميطـلعش حـاجه اقـل من المـتوقع زي ده .. عـمرو عـنده احـسن بكـتير واتمنى زي مـا قـلت انه ميستعجلش .. حاجه حلوة في وقت طويل .. احسن من حاجات وحشه ف وقت قـصير

[Radwa Nashaat · Rating 4 out of 5]

الديوان كوم .. و المقدمة لوحدها كوووووم تاني :-)
بحثت عن نفسي في الديوان فلم أجدني و لو في سطر :-/
و لكن قصيدة "حكايات" وصفت بطريقة مذهلة علاقتي بصديقتي حتى أنها قالت " ايه ده !!هو كان معانا؟! " :-D
"اسكندرية "و "سفر " غنيتهم و أنا بقرأهم و عملتلهم ايقاع كمان .. يصلحوا جدا لأغاني اللمة :)
"المنتمي" تصفييييييييييييييق حااااااااااااااااد و بس كده :)

[Do'aa · Rating 4 out of 5]

الديوان رائع، ابتداءًا من المقدمة للنهاية، فعلًا.
الديوان دا كان مفاجئ ليا ماتوقعتش يمون فيه الكَم دا من الحاجات الرائعة إللي بحب أقرأها أكتر من مرة لعمرو.
إنت بتبدأ الديوان بحالة معينة و من صفحة لصفحة الحالة دي بتتغير فا على الآخر الديوان بتكون حاسس إنك مش على لأرض، حرفيًا
الديوان رائع جدًا و لكن الطبعة سيئة جدًا جدًا.

[Toqa Mustafa · Rating 3 out of 5]

الخوف مكلبش في القدم والسكة واصلة على العدم

[مؤيد · Rating 4 out of 5]

يُنصح بـقراءة المقدمة ..

http://ask.fm/AmrAboZeed/answer/12778...

[Lobna · Rating 3 out of 5]

بنتمي للذنب المتكرر و الظلم الفج المتبرر
بنتمي للشارع لو قرر يخرج عن صمته و يتألم
......
و انتمي للثورة اللي تملي بتوصل خاين للعرش

[Khadija]

يا عزيزتي انا نمت من القهرة
و احتاجت اشكيلِك
فصحيت

[Fadia Tarek · Rating 4 out of 5]

زى الأساطير الكوميدية
عن ناس حظها دايما عاثر
أنا فزت كتير جدا قبلك
و معاكى لقيت نفسى الخاسر