مين اللي قال إن القمر يشبه لمحبوب الفؤاد

في رواية خان الخليلي بيقول أحمد عاكف لصديقه المحامي أحمد راشد ولآخرين في قعدة على القهوة: اسمعوا القول الفصل، أجمل ما تسمع الأذن، سي عبده الحامولي إذا غنى يا ليل.. والشيخ علي محمود إذا صعد مئذنة مسجد الحسين وأذن لصلاة الفجر، وأم كلثوم في دور "إمتى الهوى يجي سوا". غنت أم كلثوم 19 دور على مدى تاريخها الغنائي الطويل، 9 منهم لحنهم الشيخ زكريا، ومن ضمنهم الدور اللي كتب عنه نجيب محفوظ ده. وفي دور تاني يعتبر من أفضل ما لحنه الشيخ زكريا من أدوار، ومن أفضل الأدوار اللي غنتها أم كلثوم، بل وبيعتبر من أفضل الأدوار العربية كلها وأجملها، وهو دور: هو ده يخلص من الله. وده أول دور يلحنه الشيخ زكريا للست وفيه استعرض موهبته في التلحين وأبرز كل امكانيات صوت أم كلثوم. وغنت أم كلثوم 10 أدوار تانية من تلحين داود حسني، لكن لا وجه للمقارنة مع ألحان الشيخ زكريا.
في أدوار شهيرة تانية، أنا شخصيا بحب منها: أنا هويت لسيد درويش، وأحب أشوفك كل يوم لعبد الوهاب، ودور عمله زكريا لأم كلثوم اسمه: مين اللي قال. الأشهر إن الدور بيغنيه المطرب ووراه البطانة. الدور بيتكون من مذهب وأغصان فالبطانة تقول المذهب وبعدين يقول المغني الأغصان. وفي بعض الأدوار اللي بيقوم فيها المطرب لوحده بالأداء. موضوع الدور بيكون عادة الحب والغرام والغزل والهجر والفراق.. وبيكتبه زجال.. مثلا دور هو ده يخلص من الله كتبه بديع خيري وده راجل معجون بمية عفاريت لما يكتب:
هو ده يخلص من الله القوي يذل الضعيف
حتى يبخل بالمطلة شيء ولو دون الطفيف
ليه دا كله مين يقول له
اتهدي وخليك لطيف
وبعدين يقفل الدور ويختمه وهو بيحايل في محبوبته اللي مطلعه عينه ويقول:
لين شوية مش علي
كن على روحك رئيف
صون حلاوتك من شقاوتك
واتهدي وخليك لطيف.
لما فكرت أكتب عن الأدوار قولت لازم نقول يعني إيه دور الأول؟ ببساطة ومن الإسم بتاعه يعني يدور ويلف ويرجع تاني.. بيشوف ابتدا من أنهي مقام ومهما راح واتنقل ولف الدنيا بتاعة المقامات لازم يدور ويرجع من حيث ابتدى. ورغم إن نجيب محفوظ قال إن أعظم دور هو: إمتى الهوى، ورغم إن بتوع المزيكا بيقولوا إن أعظم وأجمل دور في تاريخ الموسيقى العربية قاطبة هو: هو ده يخلص من الله. لكن أنا شخصيا بحب دور: مين اللي قال، وهو من ألحان الشيخ زكريا وكلمات عبد الرحمن فياض.
بيقول في المذهب:
مين اللـــــــي قال إن القمر يشبه لمحبوب الفؤاد
حسن القمر يوم و الحبيب حسنه دواما في ازدياد
وبعدين تسكت يعني، لأ أبدا تكمل وهي بتقارن بين المحبوب، وبتدلعه وبتسميه: الحِب، بكسر الحاء، وبين القمر فتقولنا:
الحِب من طبعه الدلال أمـــــا القمر طبعه السكون
الدلال عكس السكون، طب جابها منين وليه بيعمل في المستمعين كده، وهو ده يخلص من الله يا ست؟
https://www.youtube.com/watch?v=Cah3f...