تحدي عشرين حاجة محدش يعرفها عني

Nael Eltoukhy باصى تحدي كتابة عشرين حاجة محدش يعرفها عني.. ماشي
1- من وحي قراية يوميات بودلير، عندي دايما شعور بالوحدة.. مع ذلك، نزوع شديد الحيوية للحياة والمتعة.
2- أنا ختمت القرآن وأنا عندي 11 سنة وعندي إجازة في قراءة حفص، وعلّمت نفسي قراءة تانية كمان.
3- في أماكن كتير بحبها بسبب إني قضيت فيها وقت كبير من عمري واتعلمت فيها حاجات وعرفت قصص وحكاوي، (أنا مولود في الجمالية ولحد ما بقى عمري 6 سنين عشت ما بين هناك وبين الدرب الأحمر) (قعدت في مدينة السلام لحد مابقى عندي 20 سنة كل الدراسة وحفظ القرآن وبدايات النزول لشغلانات مختلفة وبنت الجيران.. كانوا وأنا هناك) (أول مرة سبت البيت وقررت استقل عن أهلي كانت بعد ما اتقبض على بسبب مظاهرات الانتفاضة الفلسطينية (سبتمر 2000) وروحت عشت في بيت في منطقة الجبل الأصفر اللي بعد المرج، وكان الإيجار وقتها 100 جنيه في الشهر، وكنت طالب في حقوق عين شمس، وكنت بعلم طلبة معهد أزهري قرآن وأحكام تجويد) بقيت الأماكن بسرعة كده (جامع الأزهر، دار ميريت، مكتب نبيل الهلالي، قهوة الخُن، الكاب دور، دار الكتب، مكتبة القاهرة الكبرى العامة، مكتبة معهد الدراسات الشرقية، مقر مركز دعم لما كنا في جاردن سيتي).
4- لما حد بيطلب مني كتابة مقال بقول في بالي يا أرض انشقي وابلعيني وببقى خايف من جرأتي لما بوافق.
5- مع الوقت والعمر بقيت أكثر هدوءا.
6- بحكم تربيتي وأفكاري دايما عندي شعور عام بالرضا والاستغناء.
7- كان زمان عندي شغف أكتر من دلوقتي بالقراية وبشرا الكتب وبالفرجة على الأفلام.. ومرة زمان برضه كنت بتناقش مع أحد أصدقاء العمر وكان بيشكي إن الناس وقصص الحب والأخوية النبيلة في الواقع مش زي اللي بنقرا عنها.. وده كان سبب أساسي إني أهجر القوالب الجامدة بتاعة الكتب والتربية الثورية المصطعنة واللي بتعمل ازدواج حقيقي للناس (بس اللي مش بتنصب يعني) وإني أعرف إن الحياة والواقع أكثر غنى ورحابة وتنوع. فبقيت أصيع في الشوارع أكتر ما بقرا.
8- زمان كان عندي طاقة كبيرة لمعرفة ناس كتير ولقراية كتب كتير، وإنت ماشي لوحدك هتلاقي الغث والسمين وبعدين مع الأيام بتطور منهج لنفسك عشان تختصر وقت؛ لأن طبيعة الأشياء إن الفن كثير والحياة قصيرة.
9- بحب اسمع أم كلثوم وعبد الوهاب والشيخ مصطفى اسماعيل والشيخ نصر الدين طوبار وسيد مكاوي وشوقي القناوي وحفني أحمد وعلى الحجار ومحمد منير وعمرو دياب وفيروز وأنغام وكامليا جبران وسعاد ماسي وزياد رحباني..
10- خالد عبد الحميد اللي علمني أروح دار الكتب وأدور على الأخبار القديمة وأحب الأرشيف، والجدعنة، وإني ابقى متفائل دايما مهما حصل، وعلمني قبل ما نطلع الشغل (دار ميريت) نقعد على القهوة ونشرب حجرين اصطباحة.
11- شريف يونس أول ما عرفته كان بسبب كتابه سؤال الهوية اللي علمني حاجات ونقلني فكريا بره الماركسية وخلاني مهتم بقراية فوكو وليوتار وغيرهم فيما بعد.. وروحت عشان اتعلم منه، وهو تقريبا اللي مربيني فكريا، وأول واحد قرا روايتي (عضو عامل) قبل طباعتها. وكان من أسعد الحاجات اللي حصلت إن شريف تحديدا يشكرني ويشرفني بكتابة اسمي في كتابه الأخير: البحث عن الخلاص.
12- من اللي كتبه بول بولز ومحمد شكري، نفسي يكون عندي فرصة لزيارة المغرب.
13- أول الناس اللي لما ببقى متدايق شوية وبحب أفضفض معاهم هما، ومن غير ترتيب، نائل الطوخي ومحمد ربيع وشريف يونس وساعات خالد عبد الحميد..
14- الناس اللي عرفتهم معرفة مباشرة وليهم أفضال (إنشالله فضل كونهم موجودين بس في الحياة ومنهم ناس مش معروفين، ومنهم ناس مش موجودين دلوقتي معانا) محمود العالم، ونبيل الهلالي وأحمد حسان، شريف يونس، محمود الورداني، خالد فهمي، نائل الطوخي،خالد عبد الحميد، ربيع وشافعي ونيبو وناجي ووائل ورحال ومازن وأشرف يوسف وإسلام محمد وسماح جعفر وليلى أرمن ووسام رجب وسماح سليم وهانية شلقامي وإيمان فرج ونيرمين نزار ويارا شاهين وداليا عبد الحميد وراندا أبو الدهب وحنان شافعي وسهى زكي وأحمد نبيل وصمويل خيري وعصام شعبان ومحمد ومحمود فرج وعمر سعيد ويحيى وجدي وعلاء كمال ووائل عشري وياسر عبد اللطيف ووائل عبد الفتاح وأحمد غربية وسميح منسي..
15- بحب السينما والموسيقى.
16- عمري ما كرهت حد ولا اتكبرت على حد.
17- صاحبت وحبيت بنات كتير.
18- اتعلمت من كتر الفقد إني ما اتعلقش زيادة عن اللزوم بحاجة ولا بحد ولا بمكان ولا بذكرى، دايما شنطتي على ضهري..
19- اتعلمت إن الذاكرة هي اللي محتاجة تدريب، كده كده هتنسى لو مش بتراجع ومش بتبص وراك..
20- احنا مش هنعيش يا روحي مرتين، انبسطوا..