نكد

بحب أوي لما حد يجي يحكي لي حاجة خاصة مضايقاه في حياته سواء من باب الفضفضة أو لأخذ الرأي، خصوصاً من دواير المعارف الأوسع مش الأنتيم يعني عشان دول طبيعي يحكوا لي أصلاً، هم لو محكوش يبقى فيه حاجة غلط يعني!
وبتضايق جداً لو حد قريب مني ياخد جنب لما يكون عنده مشكلة لحد ما تخلص من غير ما يقول بحجة إنه ميشغلناش بمشاكله وينكد علينا والكلام ده
بحس إن الرغبة في مشاركة الحزن أو الألم هي اللي بتعمق العلاقات، الفرح طبيعي الواحد بيكون مبسوط وبيعلن فرحه على الملأ لكن في الحزن أو الحاجات اللي بتضايق عموماً عادة الواحد بينطوي ع نفسه وياخد جنب؛ فلما يختار حد معين يفضفض معاه أو يستشيره ده بيبقى ليه معنى كبير أوي
وطبعاً هنا أنا مبتكلمش عن الناس اللي بتمشي تشتكي ليل ونهار وتصور إن حياتها سودة وكلها مشاكل وكل ما تشكهم شوكة يعملوا مناحة ولما يحصلهم حاجة كويسة محدش يعرف عنها حاجة غير بالصدفة، دي ناس مريضة ربنا يبعدهم عنا أصلاً
أنا بتكلم عن الناس السوية اللي بتحتاج بعض فعلاً وبتضامن مع بعض في الحزن قبل الفرح
ومن هذا المنطلق أحب أقولكم إني بحب النكد والمشاكل أوي يعني فابقوا نكدوا عليا بمشاكلكم عادي متقلقوش 😁
#صفحات_من_حياتي #سارة_الليثي